Մոտ 150 բնակիչ ունեցող փոքրիկ Արդվի գյուղը հարուստ է պատմական և բնական հուշարձաններով: Այստեղ է գտնվում «Օձի պորտը»՝ անսովոր բնական հուշարձանը, որը հիշեցնում է ժայռի ամբողջ երկայնքով ձգվող օձի մարմին: Այդ օձի պորտից հոսում է ջուր, որը, ասում են, բուժիչ է: Արդվիում կարելի է տեսնել բազմաթիվ յուրահատուկ խաչքարեր, միջնադարյան գերեզմաններ և դամբարաններ, ինչպես նաև մի քանի եկեղեցի: Դրանցից ամենահայտնին՝ Սուրբ Հովհաննեսը (Սրբանես, VIII դար), կոչվում է սրբադասված կաթողիկոս Հովհաննես Օձնեցու անունով, որի գերեզմանը նույնպես այստեղ է: Ի դեպ, տեսարժան ճարտարապետությունից բացի, վանքը հետաքրքիր է նրանով, որ այստեղ են նկարվել Սերգեյ Փարաջանովի լեգենդար «Նռան գույնը» ֆիլմի որոշ դրվագներ:
